Tulang Muntikan Ko nang Ibigay Sa’yo

Sa bawat umagang

Landas nati’y nagsisiping,

Sa bawat kinabukasang

Sa buhay ko’y ika’y dumarating,

Kung maaari lamang ialay

Itong aking mga mata

Nang iyo ring maitanong

Kung ang “ikaw” ay totoo ba!

Damhin mo ang eksena:

Mahangin, nakatayo tayong dalawa

Mata ko’y bihag ng iyong imahe.

Ang buhok mong nakasintas

Sa ihip ng hangin nakikikumpas.

Ang malambot na hagkan ng iyong balat,

‘Di ko man dama, imahinasyon ko’y mulat.

Ang mga silip ng mapaglaro mong mga mata,

Dinulot sa aki’y kay tamis na sumpa!

Ang mapula’t basa mong mga labi,

Gusto kong madampi.

Ang hulma’t hubog ng iyong pisngi,

Nais kong minsa’y masagi!

Babaeng totoo ka bang aking panaginip

O totoong ikaw nga’y babaeng panaginip lang?

Pagkat kung ang sabi nila’y walang perpekto sa mundong ganap,

Ang “sila’y” ika’y ‘di pa nahahanap!

~ by dyeisi on August 13, 2008.